Kola Bino olwanyise Olusu

OMUNTU okwambala n’anyuma tekikoma ku ngoye, nviiri, ngatto na nsawo. Kitwaliramu ebintu bingi ddala.
 
Kikuba ensonyi omusajja oba omukazi ayambadde n’atonnya mmooli , kyokka olukuyitako n’owanika ennyindo oba okugikwatako olw’olusu olubeera lumuvaako.
 
Waliwo ebintu ebiwerako ebireetera abantu okubeera n’ensu. Oluusi bubeera bulwadde ate abalala buba bugayaavu nga bwe bubatuusa okuwunya ekkalalume ng’ery’omusota.
 
Olusu luno omuntu alufuna mu biseera mw’avubukira. Mu bantu abamu lubeera lwa maanyi naye ate mu balala tekibeera bwe kiti.
 
Ensu zibeeramu ebika, waliwo oluva mu nkwawa, mu bitundu by’ekyama, ate n’oluva ku mubiri gw’omuntu gwonna. Okusobola okweggyako olusu luno
  – Naaba emirundi egitakka wansi w’ebiri buli lunaku.
 
Buli lw’okeera ku makya n’otonaaba, obeera n’emikisa mingi okutuuyana, n’ekivaamu kuvaamu lusu.
 
  – Weewale okudda mu lugoye lwe wabaddemu kubanga bw’oba walutuuyaniddemu, lujja kuvaamu olusu. Kino kizingiramu n’obugoye obusooka ku mubiri nga obuwale, vesiti, obuleega, ppeti n’ebirala.
 
  – Weemanyiize okwesalira mu nkwawa n’e buziba. Ebisanja ebyo gye bikoma okusaakaatira, bituuyana n’ekivaamu kuwunya. Naye ebitundu bino bwe bikuumibwa nga biyonjo ne bw’otuuyana biyinza obutawunya.
 
   – Bw’omanya nti olina endwadde z’ekikaba, kibeera kirungi wejjanjabe nga bukyali kubanga bwe zigenda zikula, ezimu zireeta olusu mu bitundu by’ekyama.
 
   – Bw’oba osobola, funa ebbombo weemanyiize okulinaabisa ng’ekyangwe, mu bbanga ttono ojja kufunamu enjawulo. Bwe kitaba ekyo, osobola okunaaba amazzi g’entamu, nago gakola bulungi ku kizibu kino.
 
   – Waliwo n’obuwoowo (deodrant) omuntu bw’asobola okwesiiga mu nkwawa oba okwefuuyira omubiri gwonna okwegobako olusu.
 
Wabula nga tonnakakozesa oteekwa okusooka okunaaba n’otukula bulungi, kubanga bw’okeekuba ng’oli mujama kayinza okwongera ku kizibu kino.
 

Be the first to comment

Leave a Reply

Your email address will not be published.


*